Kalaallit Nunaanni sullivinni avatangiisit pillugit ilinniartitaanerit tamanit peqataaffigisassat pillugit nalunaarut

Kalaallit Nunaanni sullivinnik avatangiisit pillugit inatsimmi § 9, imm. 2, § 9 a, imm. 2, § 57, imm. 1, aamma § 57 a malillugit, tak. inatsimmik nalunaarut nr. 1048, 26. oktober 2005-imeersoq, inatsisikkut nr. 1382, 23. december 2012-imeersukkut aamma inatsisikkut nr. 724, 13. juni 2023-meersukkut allanngortinneqartumi, piginnaatitsisoqareernikkut aalajangersarneqarput:

Kapitali 1 - Pineqartut

§ 1. Sullivinni avatangiisit pillugit ilinniartitaanerit tamanit peqataaffigisassani pineqarput:

1. Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat ilinniartitaanerat.
2. Illuliortiternermi sanaartornermilu sulisorisat isumannaatsuunissaannik peqqissuunissaannillu sulianut ataqatigiissaarisut ilinniartitaanerat.

§ 2. Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartinneqarnissaannik, Sullivinnik Nakkutilliisoqarfik neqerooruteqartarpoq nalunaarummi uani kapitali 2 malillugu.

§ 3. Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitaaneq pillugu nalunaarummi matumani kap. 5 malillugu ilinniartitsinissamik neqerooruteqartartut Sullivinnik Nakkutilliisoqarfimmit akuerisaasut neqerooruteqarsinnaapput.

Kapitali 2 - Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat ilinniartitaanerat

Siunertaq imarisaanullu immikkut piumasaqaatit

§ 4. Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartinneqarneranni siunertarineqarpoq pitsaaliuinermik suliaqarnerup nukittorsarneqarnissaa, sullivinnilu avatangiisit pillugit kattuffiup sulinerata sunniuteqarnerulersinnissaa. Isumannaatsuunissap peqqissuunissallu suliassartaat isumagisinnaaqqullugit periaatsinik sullivinnilu avatangiisit pillugit ilisimasassanik pisarialinnik sullivinni avatangiisit pillugit sinniisuutitat aamma sulisunik siulersuisut ilisimasaqalernissaat ilinniartitaanerup qulakkiissavai. 

§ 5. Sullivinni avatangiisit pillugit ilinniartitaaneq, pikkorissarlutik peqataasut sullivinni avatangiisit pillugit ilinniartinneqarnerat ima pilersaarusiorneqassaaq, sullivinni avatangiisinut tunngasut tamakkiisumik paasineqartussanngorlugit tulliusut atuartitsissutiginerisut

1. suleqatigiinnermut, ilisimasaqalersitsinermut aamma perorsaajutigaluni ilinniartitsinikkut sunniiniutinut tunngaviit, sullivinni avatangiisit pillugit kattuffimmi atorneqarsinnaasut,
2. Kalaallit Nunaanni sullivinni isumannaallisaanermik peqqissutsimillu suliaqarnermi suleqatigiinneq pillugu nalunaarut malillugu sullivinni avatangiisit pillugit kattuffiup suliassai atuuffiilu, matumani ukiumoortumik sullivinni avatangiisit pillugit oqallinnermut peqataaneq,
3. sullivinni avatangiisit pillugit suliallit sulinerat aamma peqataasut sullivinni avatangiisit pillugit sulialinnut allanut attuumassutaat, matumani Sullivinnik Nakkutilliisoqarfik il.il. eqqarsaatigalugit,
4. sullivimmi aaqqissugaanerit tassungalu atatillugu suleqatigiinnerit sullivinni avatangiisit pillugit kattuffiup peqataaffigisai suleqataaffigisaalu,
5. sullivinni avatangiisit pillugit kattuffiup sullivinni avatangiisit pillugit pitsaaliuinermik pilersaarusiortarnera piviusunngortitsisarneralu,
6. periaatsit pitsaaliuinermi atorneqarsinnaasut, matumani sullivinni avatangiisit pitsaasut isumaqarneri, sullivinni avatangiisit pillugit misissuinerit, nakkutilliilluni misissuinermi skiimat allattuiffiit atortullu assingusut sullivinni avatangiisitigut ajornartorsiutit paasiniarnissaannut atorneqarsinnaasut, sullivinni avatangiisitigut ajornartorsiutinik malussarniutit ilanngunnissaat, sullivinnik naliliinissanut atortussiorneq, kiisalu sullivinni avatangiisitigut tarnip pissusaannut iliuusissatut periarfissat aamma
7. ajutoornernut, toqunartortortitaanernut aamma peqqissutsimut ulorianaatinut atatillugu sullivinni avatangiisit pillugit kattuffiup suliassai.

Ilinniartitaanerup aaqqissuunnera

§ 6. Ilinniartitaaneq 22 tiiminik sivisussuseqassaaq, ilanngullugit unillatsiartarnerit ulloqeqqasiornerit ilanngunnagit. 

Imm. 2. Ilinniartitaaneq annerpaamik sapaatit akunnerisa 7-it iluanni ingerlanneqassaaq.

§ 7. Ilinniartitaaneq kalaallisut danskisullu neqeroorutigineqassaaq.  Aammattaaq atuartitsinermi allattariarsornermi atortut oqaatsini marlunni pineqartuni pigineqassapput. 

§ 8. Ilinniakkap ilusaa pikkorissarnissamut nalunaarnermi ilisimatitsissutigineqarsimassapput. 

Imm. 2. Ilinniartitaaneq internetikkut atuartitsinermik ilaqassappat, pikkorissarnermut peqataasussaq IT-mut piginnaasanik qanoq ittunik  piginnaasaqassanersoq aamma pikkorissarnermut peqataasussaq teknikkikkut atortussanik qanoq ittunik atugaqassanersoq allassimassaaq.

Kapitali 3 - Illuliortiternermi sanaartornermilu sulisorisat isumannaatsuunissaannik peqqissuunissaannillu sulianut ataqatigiissaarisut sullivinni avatangiisit pillugit ilinniartitaanerat

Siunertaq aamma imaanut immikkut piumasaqaatit

§ 9. Illuliortiternermi sanaartornermilu sulisorisat isumannaatsuunissaannik peqqissuunissaannillu sulianut ataqatigiissaarisut ilinniartitaanerannut siunertarineqarpoq illuliortiternermi sanaartornermilu suliaqarnermut ataqatigiissaarisut, ataqatigiissaarisunik atuuffimmik namminneq suliaqarsinnaanissaannut piginnaanngorsarnissaat. Ilinniartitaanerup qulakkiissavaa, isumannaatsuunissamut peqqissutsimullu suliassartat aaqqissuulluakkamk isumagisinnaaqqullugit ataqatigiissaarisut periaatsinik sullivinnilu avatangiisit pillugit ilisimasassanik pisarialinnik ilisimasaqalernissaat. 

§ 10. Illuliortiternermi sanaartornermilu sulisorisat isumannaatsuunissaannik peqqissusaannillu sulianut ataqatigiissaarisunik sullivinni avatangiisit pillugit ilinniartitaanerup imarisaa pilersaarusiorneqassaaq, peqataasut makkunatigut atuartinneqartussanngorlugit

1. suleqatigiinnermut, ilisimasaqalersitsinermut aamma perorsaajutigaluni ilinniartitsinikkut sunniiniutinut tunngaviit kiisalu sanaartornermi suliaqartut sunnernissaat, matumani sulisorisat aamma sulisunut siulersuisut sullivinni avatangiisinut siuarsaavigineqarnissaat eqqarsaatigalugu,
2. ataqatigiissaarisup pisussaaffii aamma atuuffia, sanatitsisup pisussaaffii pillugit Kalaallit Nunaannut nalunaarummi malittarisassat malillugit, 
3. sullivinni avatangiisit pillugit suliallit kiisalu ataqatigiissaarisup aamma sullivinni avatangiisit pillugit kattuffiup, sullivinni avatangiisit pillugit suliaqartartunut allanut attuumassuteqarnerat, matumani Sullivinnik Nakkutilliisoqarfik il.il. eqqarsaatigalugit,
4. illuliortiterfinni sanaartorfinnilu sullivimmi aaqqissugaanerit, ataqatigiissaarisup peqataaffigisai, matumani isumannaallisaaneq pillugu ataatsimiinnerit aamma isumannaallisaaneq pillugu siunnersuisoqatigiit siulersornissaannut ingerlannissaannullu tunngavissat periaasissallu,
5. isumannaatsuunissaq peqqissuunissarlu pillugit pilersaarummik suliaqarneq, attatsiinnarneq aamma naammassinninneq,
6. ataatsimut suliaqarfinni kingunissalimmik pilersaarusiorneq aamma pitsaaliuinermik suliassap ingerlanneqarnissaa,
7. periaatsit pitsaaliuinermi atorneqarsinnaasut, matumani sullivinni avatangiisinik misissuisarnerit, nakkutilliinermi allattuisarnerit atortullu tamakkununnga assingusut sullivinni avatangiisitigut ajornartorsiutit paasiniarnissaannut atorneqarsinnaasut, sullivinni avatangiisitigut ajornartorsiutinik malussarniutit ilanngunnissaat, sullivinnik naliliinissanut atortussiorneq, kiisalu sullivinni avatangiisitigut tarnip pissusaannut iliuusissatut periarfissat aamma
8. sanaartortoqarneranut atatillugu sullivinni avatangiisit pillugit aqutsineq aamma
9. ajutoornernut, toqunartortortitaanernut aamma peqqissutsimut ulorianaatinut atatillugu sullivinni avatangiisit pillugit kattuffiup suliassai.

Ilinniartitaanerup aaqqissuunnera

§ 11. Ilinniartitaaneq 37 tiiminik sivisussuseqassaaq, ilanngullugit unillatsiartarnerit ulloqeqqasiornerit ilanngunnagit. 

Imm. 2. Ilinniartitaaneq annerpaamik sapaatit akunnerisa 15-it iluanni ingerlanneqassaaq.  

§ 12. Ilinniartitaanermik ingerlatsisussatut neqerooruteqartut ilinniartitaanernut tamanut ilinniartitsissutissatut pilersaarut suliarissavaat. Ilinniartitsissutissatut pilersaarutit ataasiakkaat §§ 9-11 aamma 13-17-imi piumasaqaatit piviusunngortissimassavaat, aamma ilanngussaq 1-imi paasissutissanik allassimasunik imaqassallutik.  

§ 13. Atuartitsineq kalaallisut danskisulluunniit neqeroorutigineqassaaq. Aamma atuartitsinermi allattariarsornermi atortut, atuartitsinermi oqaatsit atorneqartut malillugit allassimassallutik, taamaattorli tak. § 23, imm. 4.

Imm. 2. Atuartitsineq immikkut akuersissuteqanngitsumik oqaatsit allat atorlugit ingerlanneqarsinnaavoq, ilinniartitsissutissatut pilersaarut akuerineqarsimasoq tunngavigalugu ilinniartitaaneq ingerlanneqarpat. 

§ 14. Ilinniakkap ilusaa pikkorissarnissamut nalunaarnermi ilisimatitsissutigineqarsimassapput.

Imm. 2. Ilinniartitaaneq internetikkut atuartitsinermik ilaqassappat, pikkorissarnermut peqataasussaq IT-mut piginnaasanik qanoq ittunik  piginnaasaqassanersoq aamma pikkorissarnermut peqataasussaq teknikkikkut atortussanik qanoq ittunik atugaqassanersoq allassimassaaq.

Imm. 3. Internetikkut atuartitsineq imaattunik piumasaqaatitaqarpoq: 

1. Pikkorissartitsinermik Ilinniartitsinissamik neqerooruteqartartut, it-systemit atorneqartussat misilittarneqareersimanissaat aamma ilinniartitaanerup ingerlanneqarnissaanut tulluartuunerat piffissami qaqukkulluunniit uppernarsarsinnaassavaat. 
2. Pikkorissartut internetikkut tunngaveqartumik atuartitsinissap ingerlannissaanut ilisaritinneqassapput.

Kapitali 4 - Sullivinni avatangiisit pillugit ilinniartitaanernut piumasaqaatit ataatsimoorussat

Perorsaanikkut tunngaviit

§ 15. Avatangiisit pillugit ilinniartitaanerit pilersaarusiorneqassapput perorsaanikkut tunngaviit tulliuttunik imaqartillugit:

1. Pikkorissarnermut peqataasut sullivii aallaavigalugit aamma pikkorissarnermut peqataasut sullivinni avatangiisit pillugit kattuffimmi atuuffiannut imaluunniit illuliortiternermi sanaartornermilu ataqatigiissaarisunik ilisimasaat misilittagaallu aallaavigalugit atuartitsineq assigiinngiiaartinneqassaaq.
2. Pikkorissanermut peqataasut suliffimmi sullivinni avatangiisit pillugit suliaqarnissamut periaatsit suliaqarnikkut sungiusarnermi ilinniassavaat, taakku ataasiakkaat suliffeqarfianit pissutsinik piviusunik aallaaveqarnerussallutik.
3. Atuartitsineq imaalillugu aaqqissuunneqassaaq pilersaarusiorneqassallunilu,
4.    
   1. pikkorissarnermut peqataasut pimoorussamik suleqataatillugit,
   2. sullivinni avatangiisit pillugit suliassat aaqqiiviginissaannut misilittakkat pikkorissarnermut peqataasut akornanni paarlaateqatigiissinnaatillugit,
   3. pikkorissarnermut peqataasut suliassittarlugit ajornartorsiutinillu aaqqiissuteqarniartittarlugit aamma
   4. atuagarsornermi teoriit aamma suliaqarnermi sungiusaatit nikerartillugit,
   5. pikkorissarnermut peqataasut ataasiakkaat suliassamut tulluartumik ilisaritinneqarnissaa aamma suliani pillugu akissuteqarfiginissaa qulakkeerneqassapput, tak. § 17 aamma
   6. atuartitsisup, pikkorissaaneq ingerlatillugu pikkorissarnermut peqataasut attavigissavai siunnersorsinnaallugillu.

Sullivinni avatangiisit pillugit ilinniartitaanerit pilersaarusiornissaat

§ 16. Ilinniartitaaneq atuaqatigiikkuutaat amerlanerpaamik 20-kkaarlugit pikkorissaanertut ingerlanneqassaaq.

§ 17. Pikkorissarnermut peqataasut ilinniartitaanerup ilaatut, kisianni nalunaaquttap akunnerisia amerlassusiata kisitsisaata avataatigut, suliaqarluni suliassaq ingerlatissavaat, tassani suliassami pikkorissarnerup imai, pikkorissarnermut peqataasut ataasiakkaat sullivinni avatangiisit pillugit kattuffimmi suliaannut imaluunniit pikkorissarnermut peqataasut ataasiakkaat ataqatigiissaarisunik suliaannut kattunneqassapput.

§ 18. Sullivinni avatangiisit pillugit ilinniartitaanernik ilinniartitsinissamik neqerooruteqartartut sullivinni avatangiisit pillugit ilinniartitaanernik naammassinnissimasutut pikkorissarnermut uppernarsaammik pikkorissarnermut peqataasunut tamanut tunniussissapput. 

Init atuartitsiviit aamma atortorissaarutit

§ 19. Sullivinni avatangiisit pillugit ilinniartitaanerit inini atuartitsivinni tulluartuni pisariaqartinneqartunik ingerlalluartunillu perorsaanikkut aamma teknikkikkut atortorissaaruteqartuni ingerlanneqartassaaq, matumani internetimut iserfissaq ammasoq.

Imm. 2. Atortussiat attuumassutillit il.il. pikkorissarnermut peqataasunit pissarsiarineqarsinnaassapput.

Atuartitsisut

§ 20. Sullivinni avatangiisit pillugit ilinniartitaanerni atuartitsisoq ilinniakkamigut aamma sullivinni avatangiisinut tunngasutigut tulliuttunik piginnaasaqassaaq: 

1. Ulluni 9-ni atuartitsisutut pikkorissarsimassaaq. Sullivinnik Nakkutilliisoqarfiup atuartitsisunik pikkorissaaneq ingerlattassavaa, tak. sullivinni avatangiisit pillugit ilinniartitaanerit tamanit peqataaffigisassat pillugit ilinniartitsinissamik neqerooruteqartartut pillugit nalunaarut.
2. Sullivinni avatangiisit pillugit ilinniartitaaneq tamanit peqataaffigisassaq naammassisimassavaa, tak. § 1, imaluunniit sullivinni avatangiisit pillugit ilinniartitaaneq assingusoq naammassisimassallugu.
3. Sullivinni avatangiisit pillugit suliaqarnermik imaluummiit suliamik tassunga assingusumik misilittagaqassaaq.
4. Ikinnerpaamik 120 tiiminut naapertuuttumik perorsaaneq pillugu ilinniartitaanermik naammassinnissimassaaq. 
5. Naleqquttumik atuartitsinermik misilittagaqassaaq.

Naliliineq

§ 21. Peqataasimasut atuartitsisuusimasullu naliliineri tunngavigalugit sullivinni avatangiisit pillugit ilinniartitaanerit ukiumut ataasiarluni naliliiffigineqartassapput.

Imm. 2. Kalaallit Nunaanni Sullivinni Avatangiisit pillugit Siunnersuisoqatigiit ukiumoortumik naliliisimaneq pillugu ilisimatinneqartassapput.

Kapitali 5 - Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissamik neqeroorutillit akuersissutigineqartarnerat

§ 22. Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissamik neqeroorutillit 
akuerineqarnissaannut, ilinniartitsinissamik neqerooruteqartup kapitali 3 aamma 4-mi piumasaqaatinik naammassinnissimanissaa piumasaqaataavoq.

Imm. 2. Sullivinnik Nakkutilliisoqarfiup ilinniartitsinissamik neqerooruteqartartumik akuersissutaa ukiuni 5-ini atuuttarpoq, akuersissuteqarnermut piumasaqaatit naammassineqarsimannginnerat pissutigalugu akuersissut atorunnaarsinneqarsimanngippat. 

Imm. 3. Ilinniartitsinissamik neqerooruteqartartup Sullivinnik Nakkutilliisoqarfik nalunaarfigissavaa, ilinniartitsinissamik neqerooruteqartartup akuerineqarnissamut qinnuteqarnerminut atortussiaani allassimasuni pissutsini allanngortoqarpat.  

Imm. 4. Sullivinnik Nakkutilliisoqarfiup akuersissut atorunnaarsissinnaavaa, annertuumik atornerlunneqarpat, imaluunniit ilinniartitaanerup neqeroorutigineqarsimasup pitsaassusaani annertuunik amigaateqartoqarpat.

§ 23. Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissamik neqeroorutillit 
akuerineqarnissamut qinnuteqaataat Sullivinnik Nakkutilliisoqarfimmut nassiunneqassaaq.

Imm. 2. Qinnuteqaammut ilanngunneqassapput

1. ilinniartitsissutissatut pilersaarut, tak. § 12, aamma
2. atuartitsisut piukkunnaataat pillugit uppernarsaatit, tak. § 20.

Imm. 3. Qinnuteqaateqartup aammattaaq paasissutissiissutigissavai sullivinni avatangiisit pillugit ilinniartitaaneq qanoq allaffissornikkut aqutsiffigineqassanersoq, matumani suliffeqarfimmi ilinniartitaanermut akisussaasup aqqa atorfialu ilanngullugit.

Imm. 4. Qinnuteqarnissamut atortussiat danskisut saqqummiunneqassapput.

§ 24. Ilinniartitsinissamik neqerooruteqartartut akuerisat nalilersuinermut peqataasassapput, tak. § 21, aamma pikkorissarnermut peqataasut pikkorissarnernik tamanik nalilersuisarnissaat ingerlaavartumik isumagisassallugu.  

Kapitali 6 - Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartitaanernut peqataanerannut akiliut

§ 25. Sullivinni avatangiisit pillugit sinniisuutitanut aamma sulisunik siulersuisunut sullivinni avatangiisit pillugit kattuffimmi ilaasortanut sullivinni avatangiisit pillugit ilinniartitaanerit ingerlanneqarnerannut aningaasartuutit ilaasa matussusernissaannut, pikkorissarnermut peqataasut sulisitsisui akiliummik Sullivinnik Nakkutilliisoqarfiup akiliuteqaqqussavai. Akiliutip matussusissavai Sullivinnik Nakkutilliisoqarfiup aningaasartuutaasa ilai tapiissutinit matussusigaanngitsut, tak. § 27.

Imm. 2. Akiliut maanna atuuttoq Kalaallit Nunaanni Sullivinnik Nakkutilliisoqarfiup nittartagaani allassimavoq.

Kapitali 7 - Aqutsinermi allaffissornikkut aalajangersakkat

Immikkut akuersissut

§ 26. Pisuni ataasiakkaani immikkut pisoqartillugu nalunaarummi matumani aalajangersakkat saneqqunneqarnissaat Sullivinnik Nakkutilliisoqarfiup pisortaata akuerisinnaavaa.

Imm. 2. Illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissamik neqeroorutilinnik akuerisanik soqanngippat, ilinniartitaaneq sullivimmi avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartitaanerannik taarserneqassasoq Sullivinnik Nakkutilliisoqarfiup pisortaata akuerisinnaavaa.

Tapiissutit

§ 27. Sullivinni avatangiisit pillugit sinniisuutitat aamma sulisunik siulersuisut sullivinni avatangiisit pillugit kattuffimmi ilaasortat sullivinni avatangiisit pillugit ilinniartitaaneranni aningaasartuutit ilaasa matussusernissaannut ukiumoortumik aningaasanut inatsimmi immikkut aningaasaliinikkut Sullivinnik Nakkutilliisoqarfiup tapiiffigisinnaavai. Ilinniartitaanerit ineriartortinnerannut allaffissornikkullu aqutsiffigineqarnerannut tapiissut akilerneqassaaq, matumani ilinniartitaanerit ingerlanneqarnissaannut aamma atuartitsisut akissarsiannut angalanernullu aningaasartuutinut.

Naammagittaalliorneq

§ 28. Sullivinnik Nakkutilliisoqarfiup nalunaarut manna malillugu aalajangigai Kalaallit Nunaanni sulinermi avatangiisit pillugit inatsimmi § 64 malillugu naammagittaalliuutigineqarsinnaapput.

Kapitali 8 - Atuutilersitsineq

§ 29. Nalunaarut manna atuutilersinneqarpoq ulloq 1. januar 2026.

Imm. 2. Kalaallit Nunaanni sulisilluni avatangiisinik ilinniartitaanerit tamanit peqataaffigisassat pillugit nalunaarut nr. 800, 14. juni 2023-meersoq atorunnaarsinneqarpoq.

Imm. 3. Ilinniartitsinissamik neqeroorutillit, Sullivinnik Nakkutilliisoqarfiup 1. januar 2026 nallertinnagu akuerisimasai, illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissaq pillugu nalunaarutaat una malillugu ilinniartitsissutissatut pilersaarutit pineqartut immikkut ittumik akuersissutigiteqqaartinnagit, neqerooruteqarsinnaapput. Ilinniartitsinissamik neqeroorutillit pineqartut, illuliortiternermi sanaartornermilu isumannaatsuunissaq peqqissuunissarlu pillugit sulianut ataqatigiissaarisunik sullivinni avatangiisit pillugit ilinniartitsinissamik suli kissaateqarpata, piffissaq akuersissuteqarfiat qaangiukkaangat akuerineqaqqeqqaartassapput.

Sullivinnik Nakkutilliisoqarfik, ulloq 25.11.2025

Marianne Sørensen / Sofie Bisbjerg

Ilanngussaq 1 - Ilinniartitsissutissatut pilersaarutip imai

Ataqatigiissaarisunut sulisilluni avatangiisinik ilinniartitaanermut ilinniartitsissutissatut pilersaarut minnerpaamik tulliusut pillugit allaaserinninnermik imaqassaaq:

1. Ilinniartitaanerup siunertaa.
2. Ilinniartitaanerup sannaa, matumani atuartitsinerup imaata tulleriinnilersorneri aamma piffissami pingaarnersiorneqarsimaneri.
3. Perorsaanikkut tunngaviit aamma periaatsit atorneqarsimasut.
4. Avataaneersunik atuartitsisartunik atuineq.
5. Atuartitsinermut atortussiat aamma taakku atorneqarneranut allattorsimaffik. 
6. Ilinniartitaanerup ilaasa ataasiakkaat siunertaat.
7. Ilinniartitaanerup ingerlanerani suliatigut suliassap ilanngutitinneqarnera.
8. Pikkorissarnermut atatillugu pikkorissarnermut peqataasussat tiguneqarnissaanut piumasaqaatit.
9. Pikkorissarnermut peqataasut suliassanut akissutaasa akuerineqarnissaanut tunngaviit. 
10. Pikkorissarnermik naliliineq.