Kalaallit Nunaanni piffissaq qasuersaarfissaq aamma ulloq unnuarlu sulinngiffeqarneq pillugit nalunaarut

Ujarliutit

1 - Atuuffii
2 - Piffissaq angalaffik il. il.
3 - Suleriaannaaneq aamma allatut immikkut ittumik sulisarneq
4 - Isumaqatigiissutit
5 - Sulisorisap angerlarsimaffiani sulinerni immikkut ittumik atuisitsinngitsoorutissatut aalajangersakkat
6 - Allaffissornikkut aalajangersakkat

Ilanngussaq

Ilanngussaq 1

Kalaallit Nunaanni piffissaq qasuersaarfissaq aamma ulloq unnuarlu sulinngiffeqarneq pillugit nalunaarut Kalaallit Nunaanni sullivinni avatangiisit pillugit inatsimmi, tak. inatsimmik nalunaarut nr.1048, 26. oktober 2005-imeersoq, § 3a, §§ 40-45c aamma § 67 naapertorlugit aalajangersarneqarput:

Kapitali 1 - Atuuffii

§ 1. Nalunaarummi pineqarpoq sulisitsisumi suliaqarnerni inunnik 18-inik ukioqalereersunik sulisoqartarneq.

§ 2. Nalunaarut atortuutinneqassanngilaq sulinernut, sulisorisap angerlarsimaffiani, inuup ilaqutariinni paaqqinnittussani najugaqarfigisaani, ulloq unnuarlu paaqqinninnertut ingerlanneqartussanut,

1. sulisuusoq nammineq piffissamik suliffissamik aaqqissuussissatillugu, imaluunniit
2. piffissaq suliffissaq sulinerup ingerlanneqarnerani pissutsit immikkut ittut kingunerisaattut uuttorneqarsinnaananiluunniit siumut aalajangersarneqarsinnaatinnagu.

§ 3. Piffissaq suliffissaq aaqqissuunneqassaaq taamaalilluni sulisuusut nal. akunnerisa 24-t ingerlanerini minnerpaamik nal. akunnerini 11-ni ataannartumik qasuersaarfissaqartussanngorlugit.

§ 4. Ullut unnuallu arfineq-marluk tamarmik immikkut ingerlanerini sulisuusut sapaatit akunneranoortumik ullormik unnuamillu ataatsimik sulinngiffissaqartitaassapput ullormut qasuersaarfissaatitaasumut uiggiunneqarsinnaasumik. Sapaatit akunneranoortumik ulloq unnuarlu sulinngiffeqarfissaq sapinngisamik pitinniarneqartassaaq sapaatini ajornartinnagulu tamanut ataatsikkut sullivimmi sulisorineqartunut.

Imm. 2. Imm. 1-imi oqaaseqatigiit aappaanni malittarisassaq atuutissanngilaq nunalerinermut, naatitsiveqarnernut, aallaaniarnermut piniarnermullu.

§ 5. § 3 aamma § 4 saneqqunneqarsinnaapput pisariaqartitsineq naapertorlugu, pinngortitap pissusii, ajunaarnerit, maskiinaajarnerit assigisaattulluunniit ilimageriinngisatut pisut sullivimmik pissusissaatoortumik ingerlatsinermut akornusiippata imaluunniit akornusiisimappata. Sanioqqutsineq nakkutilliinermut allattaavinnut allatulluunniit uppernarsaatissatut allanneqartassaaq.

§ 6. Inuit qullersatut atorfillit § 3-mi aamma § 4-mi aalajangersakkani pineqartunut ilaatinneqassapput,

1. siulersuisuusutut sulinerinnarnik imaluunniit pingaarnerusumik taamatut ingerlatsisuussanngippata, aamma piffissap suliffissap tungaatigut siulersugassaminnik malinnaaffiginninnissaq pisussaaffigissanngippassuk, imaluunniit nikittaattumik sulinissatut aalajangersariikkat malinnaaffiginissaat pisussaaffigissanngippassuk, imaluunniit
2. immikkut ilisimasaqarneq pissutsilluunniit tamatumunnga assingusut pissutigalugit suleriaatsit aalajangersimasut nalunaarummut ilanngussami pineqartut, iluanni immikkut atorfeqartitaassanngikkunik.

§ 7. Suleriaatsit nalunaarummut ilanngussami pineqartut iluanni § 3 aamma § 4 saneqqunneqarsinnaapput piffissanut qasuersaarfissanut ataasiakkaanut imaluunniit ullunut unnuanullu sulinngiffeqarfissanut ataasiakkaanut tunngatillugu § 32 malillugu piffissaq eqqorlugu immikkut akuersisitsiniaasoqarsinnaanngippat, aamma

1. suliamik ingerlatsineq suussusia naapertorlugu kinguartikkallarneqarsinnaanngippat, imaluunniit
2. suleriaatsit immikkut ittut saneqqutsinissaq pisariaqartippassuk.

§ 8. Piffissaq ullormut qasuersaarfissaq nal. akunnerinut 8-nut sivikillineqarsinnaavoq

1. sullivinni, nikittaattunik sulisoqarluni ingerlatsisuni, sulisut nikittaatsinnerisigut, suleqatigiiaat ataatsit suliaminnik nammassinnereerneratigut suleqatigiillu allat sulinermi aallartinnerisa akornanni piffissaq qasuersaarfissaq pitinneqarsinnaatinnagu,
2. nunalerinermik suliaqarnerni aamma ukiumi ilivitsumi (qaammatisiutit ukiuanni) ullut 30-t tikillugit aallaaniartarnerni piniariartarnernilu,
3. sulliviit ukiumoortumik naatsorsuusiorlutillu kisitsineranni imaluunniit akikilliliineranni, annerpaamilli ukiumi ilivitsumi ataatsimi 14-riartumik,
4. juulliaraq ullunik 14-inik sioqqullugu quersuarni pisiniarfinnilu ulluni kingullerni sulinerni,
5. piffissami 1. maj-imiit 1. oktober-imut aalisakkanik tunioraaruttulerfiup nalaani aalisakkerivinni
   sulinerni, aamma
6. aputaajaaneq, aamma
7. piffissaq angalaffik, ataannartumik nal. akunneri 8 sinnerlugit sivisussusilik.

Imm. 2. Suleriaatsit nalunaarummut ilanngussami pineqartut iluanni piffissaq ullormut qasuersaarfissaq nal. akunnerinut 8-nut sivikillineqarsinnaavoq ataatsimiinnernik, kulturikkut aaqqissuussinernik assigisaannillu sulianut atasumik ingerlatsisoqassatillugu, nalinginnaasumik ulluunerani ingerlanneqartartunik, kisianni pingaartumik inunnut allanut attaveqarfiginninnissaq unnukkuunerani pisariaqartinneqartillugu. Piffissamik qasuersaarfissamik sivikillilerineq pisuni taama ittuni annerpaamik pisarsinnaavoq ukiumi ilivitsumi ataatsimi annerpaamik 20-riarluni.

§ 9. Usilersuineq usingiaanerlu, aalajangersumik atorfinitsitaanngitsunik sulisoqarnerulluni ingerlanneqartussat, aamma tamatumunnga attuumassutilittut pisarialinnik suliaqarnerit, soorlu nioqqutissaasivinni quersuarnilu sulineq, § 2-mi aamma § 8, imm. 1, nr. 1-imi 2-milu pineqanngillat. Taamatut suliaqarnerni qaangiuttoortoqassappat, nikittaatunik sulisoqarluni sulineq aamma nunagi-sami namminermi angallatit uteqattaartumik angallassisut, rutebådit, pinnagit, qaangiuttoornerit naammassineranniit minnerpaamik nal. akunnerini 9-ni ataannartumik qasuersaarfissaqartitsisoqassaaq, sulisut pineqartut suleqqilersinnagit.

§ 10. Inunnik, uumasunik naasunillu paarsinermik suliaqarnerni aamma nunalerinermik suliaqarnerni, aallaaniarnerni piniarnernilu aamma naliliutit piuinnartinnissaannut pisariaqartinneqartumik suliaqarnerni sapaatit akunneranoortumik ulloq unnuarlu sulinngiffeqarfissaq kinguartikkallarneqarsinnaavoq kingusinnerusukkullu taamaaqataanik taarserneqarluni suliat nalunaarummut ilanngussami pineqartunut ilaatillugit.

Imm. 2. Taamaattorli ullut unnuallu sulinngiffeqarfissat marluk akornanni ullut unnuallu 12-init amerlanerussanngillat. Aammattaaq ullut unnuallu sulinngiffeqarfissat sapinngisamik ataannartunngorlugit inissinniarneqartassapput sulinngiffeqarfissarlu ataaseq ulluunerani qasuersaarfissamut uiggiunniarneqartassaaq.

§ 11. Sulisitsisuusup suliassanik aaqqissuussineq aamma piffissamik qasuersaarfissamik annikilliliinissap annertussusia aamma ullunik unnuanillu sulinngiffeqarfissanik allannguinissaq isumannaatsuunissamut sulisullu sinniisuinut oqaloqatiginnissutigisassavaa imaluunniit taamatut sin-niisoqanngippat sulisuunut § 8, imm. 1, nr. 3-4-mi, § 8, imm. 2-mi, § 10-mi, § 15-imi aamma § 16-imi malittarisassat malillugit aallajangiinialersinnani.

§ 12. § 5 aamma §§ 7-10 malillugit saneqqutsisoqartillugu taarsiutitut taamatulli piffissanik qasuersaarfissaqartitsisoqartassaaq imaluunniit ullunik unnuanillu sulinngiffeqartitsisoqarluni. Taarsiutitut piffissanik qasuersaafeqartitsinissaq imaluunniit ullunik unnuanillu sulinngiffeqartitsinissaq qaqutigoortumik ajornassatillugu naleqquttunik illersuiniuteqartoqartassaaq.

Kapitali 2 - Piffissaq angalaffik il. il.

§ 13. Aalajangersumik suliaqarfiusumiit allamut piffissaq angalaffik piffissatut qasuersaarfittut imaluunniit ullutut unnuatullu sulinngiffissatut naatorsuunneqassanngilaq sulisuusup suliaqarfissamut pisarnertut angalasarneraniit sivisunerutinnagu.

Kapitali 3 - Suleriaannaaneq aamma allatut immikkut ittumik sulisarneq

§ 14. Suliaqarfigisami suleriaannaatitaaneq piffissatut qasuersaarfittut imaluunniit ullutut unnuatullu sulinngiffeqarfittut naatsorsuunneqassanngilaq.

§ 15. Suliaqarfigisap avataaniilluni suleriaannaaneq piffissatut qasuersaarfittut naatsorsuunneqassaaq.

Imm. 2. Sulisuusut suleriaannaatitaanerminni suliartoqquneqarpata piffissaq qasuersaarfik kipitinneqartutut naatsorsuunneqassaaq, suliartoqqusaanermi suliatigut pisussaaffissat allaassappata imaluunniit sulisuusoq allaasunik suliassinneqassappat, aamma suleriaannaasussaaneralu angerlamut tikinnerani taamatullu taaneqartutut suliaqarunnaarnerani atuuteqqilissappat.

Imm. 3. Sulisuusut imm. 2-mi taaneqartutut suliartoqquneqarpata nalunaarummut ilanngussami pineqartutut suliaqarnerni piffissaq qasuersaarfissaq nal. akunnerinut 8-nut ikilisinneqassaaq imaluunniit kinguartinneqassalluni, kingullertullu taaneqartutut sulinerup naammassineranut atasumik pitinneqartussanngorlugu. Piffissamik qasuersaarfissamik ikililerineq imaluunniit kinguartitsineq sivisunerpaamik pisinnaavoq ukiumi ilivitsumi qaammatini tamani ulluni unnuanilu 10-ni sivisunerpaamillu ukiup ilivitsup ingerlanerani ulluni unnuanilu 45-ni. Sulisuusup piffissaq qasuersaarfissaa § 8, imm. 1, nr. 3 aamma 4 kiisalu § 8, imm. 2 malillugit annikillilerneqassappat piffisap qasuersaarfissap sivisussusissaanut inissinnissaanulluunniit periarfissaq suli ullunik unnuanillu amerlaqataannik killililiiffigineqassaaq.

§ 16. Suleriaatsini nalunaarummut ilanngussami pineqartuni sapaatit akunneranoortumik ulloq unnuarlu sulinngiffeqarfissaq angerlarsimaffigisami, suliaqarfigisami allamiluunniit suleriaannaatitaanermut atatillugu allanngortinneqarsinnaassaaq. Taamaattorli ullut unnuallu sulinngiffeqarfissat marluk akornanni ullunit unnuanillu 12-init sivisunerussanani.

Imm. 2. Ullormik unnuamillu sulinngiffeqarfissamik allanngortitsinermi ullormut unnuamullu sulinngiffeqarfissamut allamut sapinngisamik atasussanngortinniarneqartassaaq imaalillugulu ulloq unnuarlu sulinngiffeqarfissaq ataaseq ullormoortumik piffissamut qasuersaarfissamut uiggutaasussanngorlugu.

§ 17. § 15, imm. 3 aamma § 16 malillugit saneqqutsisoqartillugu taamatulli taarsiissutitut piffissanik qasuersaarfissaqartitsisoqartassaaq imaluunniit ullunik unnuanillu sulinngiffeqartitsisoqartassalluni. Pissutsit qaqutigooraluartumik tamanna ajornartissappassuk naleqquttumik illersuiniartoqartassaaq.

Kapitali 4. - Isumaqatigiissutit

§ 18. Sulisitsisutut susassalittut illuatungiliuttussap aamma akissarsisartut kattuffiata isumaqatigiissutigisinnaavaat ullormoortumik piffissaq qasuersaarfissaq killilimmik kinguartinneqarsinnaassasoq imaluunniit nal. akunnerinut 8-nut sivikillineqarsinnaassasoq.

Imm. 2. Illuatungeriit imm. 1-imi taaneqartut aammattaaq isumaqatigiissutigisinnaavaat suleriaannaatitaanermi piffissap qasuersaarfissap kinguartinneqarluniluunniit nal. akunnerinut 8-nut sivikillineqarsinnaanissaa, aamma piffissap qasuersaarfissap suleriaannaatitaanermiissinnaanissaa.

§ 19. Sulisitsisutut susassalittut illuatungiliuttussap aammalu akissarsisartut kattuffiata isumaqatigiissutigisinnaavaat sapaatit akunneranoortumik ullup unnuallu sulinngiffeqarfissap allamut inissinneqarsinnaanissaa. Taamaattorli ullut unnuallu sulinngiffeqarfissat marluk akornanni ullunit unnuanillu 12-init amerlanerusussaatinnagit. Ullut unnuallu sulinngiffeqarfissat aammattaaq ajornartinnagu ataannartussatut inissinneqarsinnaasariaqarput imaalillugulu ulloq unnuarlu ataaseq ulluunerani qasuersaarfimmut uiggiutaasinnaanngorlugu.

§ 20. Sulisitsisutut susassalittut illuatungiliuttussap aamma akissarsisartut kattuffiata isumaqatigiissutigisinnaavaat piffissaq qasuersaarfissaq aamma ulloq unnuarlu sulinngiffeqarfissaq pillugit malittarisassat saneqqunneqarsinnaassasut §§ 18-imi 19-imilu taaneqartuniit annertunerusumik. Isumaqatigiissutit taama ittut aatsaat atuussinnaassapput, Sullivinnik Nakkutilliisoqarfiup pisortaanit akuersissutigineqassagunik.

§ 21. Piffissaq qasuersaarfissaq aamma ulloq unnuarlu sulinngiffeqarfissaq pillugit malittarisassanik sanioqqutsinissamut najoqqutassaatitaasut, §§ 18-20-mi malittarisassat malillugit isumaqatigiissutaasinnaasut, sulisitsisutut susassaqartutut illuatungiliuttup aamma akissarsisartut kattuffiata akornanni isumaqatigiissummi aalajangersagaasimappata suliassaatitaasut ataasiakkaanut tunngatil-lugu saneqqutsinissaq imaluunniit piffissap suliffissap pilersaarusiornerani saneqqutsinissaq sullivimmi namminermi isumaqatigiissutigineqarsinnaavoq.

§ 22. Sulisisuusup sulisuusullu § 19-imi malittarisassat apeqqutaatinnagit isumaqatigiissutigisinnaavaat sapaatit akunneranoortumik ullup unnuallu sulinngiffeqarfissap allamut inissinneqarsinnaanissaa piffissamik suliffiusussamik pilersaarusiornermi imaluunniit suliassamik aalajangersimasumik aaqqissuunermi. Taamaattorli ullut unnuallu sulinngiffeqarfissat marluk akornanni ullut unnuallu 7-init amerlanerusinnaassanatik.

§ 23. Kapitalimi matumani aalajangersakkat naapertorlugit isumaqatigiissutit aatsaat atuussinnaassapput allaganngukkatut isumaqatigiissutaasimagunik.

Imm. 2. Isumaqatigiissutit, sullivimmi namminermi §§ 21-mi aamma 22-mi aalajangersakkat malillugit isumaqatigiissutaasut aamma sulliviup nakkutilliinermut allattaaviinut allanneqartassapput.

§ 24. §§ 18-22-mi aalajangersakkat malillugit isumaqatigiissutit atorunnaartussanngortinneqarsinnaapput malittarisassat kattuffinnut ataatsimoortukkuutaat pillugit isumaqatigiissutinut imaluunniit suliaqarfigisanut pineqartunut tunngatillugu isumaqatigiissutinut atuuttut pillugit piffissarititaa-sumi taakkulu malillugit, allatut isumaqatigiittoqarsimassanngippat.

§ 25. §§ 18-20 malillugit isumaqatigiissut, najoqqutassatut isumaqatigiissut imaluunniit § 21 malillugu sullivimmi namminermi isumaqatigiissut sullivimmi avatangiisitigut atugarisanut akuersaarneqarsinnaanngitsunut tunngavissiissappat, Sullivinnik Nakkutilliisoqarfiup pisortaata peqqussutigisinnaavaa atugarisat taakkua nalunaarummi piffissaq qasuersaarfissaq aamma ulloq unnuarlu sulinngiffeqarfissaq pillugit aalajangersakkanut naapertuuttunngortinneqassasut.

§ 26. §§ 18-22 malillugit saneqqutsisoqartillugu taamatulli taarsiissutitut piffissanik qasuersaarfeqartitsisoqarlunilu ullunik unnuanillu sulinngiffeqartitsisoqartassaaq. Pissutsit qaqutigooraluartumik tamanna ajornartissappassuk naleqquttumik illersuiniartoqartassaaq.

Kapitali 5 - Sulisorisap angerlarsimaffiani sulinerni immikkut ittumik atuisitsinngitsoorutissatut aalajangersakkat

§ 27. Piffissaq ullormoortumik qasuersaarfissaq Kalaallit Nunaanni sullivinni avatangiisit pillugit inatsimmi § 32 tunngavigalugu saneqqunneqarsinnaavoq sulisorisap angerlarsimaffiani suliaqarnerni

1. sulisorisap nammineq piffissaq suliffissaq aaqqissuutissappagu tamatumuuna ullormoortumik
2. piffissaq qasuersaarfissaq imaluunniit qasuersaarfissat,
   piffissaq suliffissaq sulianik ingerlatsinermi pissutsit immikkut ittut kingunerisaattut uuttorneqarsinnaanngippat imaluunniit siuningaaniit aalajangersarneqarsinnaanngippat.

Imm. 2. Suleriaannaanissani kapitali 4-mi piffissaq suliffissaq pillugu malittarisassat atuutissapput.

Imm. 3. Imm. 1 atortuutinneqassanngilaq sulisorisaq piffissaq suliffissaq tamakkerlugu angerlarsimaffimmi sulisassappat.

§ 28. Sapaatit akunneranoortumik ulloq unnuarlu sulinngiffeqarfissaq Kalaallit Nunaanni sullivinni avatangiisit pillugit inatsimmi § 32 tunngavigalugu kinguartikkallarneqarsinnaavoq imaluunniit allanngortinneqarsinnaalluni sulisorisap angerlarsimaffiani suliaqarnerni

1. sulisorisap nammineq piffissaq suliffissaq aaqqissuutissappagu tamatumuuna imaluunniit,
2. piffissaq suliffissaq sulianik ingerlatsinermi pissutsit immikkut ittut kingunerisaattut uuttorneqarsinnaanngippat imaluunniit siuningaaniit aalajangersarneqarsinnaanngippat.

Imm. 2. Suleriaannaanissani kapitali 4-mi piffissaq suliffissaq pillugu malittarisassat atuutissapput.

Imm. 3. Imm. 1 atortuutinneqassanngilaq sulisorisaq piffissaq suliffissaq tamakkerlugu angerlarsimaffimmi sulisassappat.

§ 29. Sulisitsisutut susassalittut illuatungiliuttup aamma sulisartut kattuffiata isumaqatigiissutigisinnaavaat piffissaq ullormoortumik qasuersaarfissaq sulisorisap angerlarsimaffimmi sulinerani saneqqunneqarsinnaassasoq.

Imm. 2. Imm. 1-imi malittarisassaq atortuutinneqassanngilaq, sulisorisaq piffissaq suliffissaq tamakkerlugu angerlarsimaffimmi sulisassappat.

Imm. 3. § 21, § 23, imm. 1, § 24 aamma § 25 imm. 1 malillugu isumaqatigiissutinut aamma atuutissapput.

§ 30. Sulisitsisutut susassalittut illuatungiliuttup aamma akissarsisartut kattuffiata isumaqatigiissutigisinnaavaat sapaatit akunneranoortumik ulloq unnuarlu sulinngiffeqarfissaq sulisorisap angerlarsimaffimmi sulinerani kinguartinneqarsinnaalluniluunniit allamut inissinneqarsinnaassasoq.

Imm. 2. Imm. 1-imi malittarisassaq atortuutinneqassanngilaq sulisorisaq piffissaq suliffissaq tamakkerlugu angerlarsimaffimmi sulisassappat.

Imm. 3. § 21, § 23, imm. 1, § 24 aamma § 25 imm. 1 malillugu isumaqatigiissutinut aamma atuutissapput.

§ 31. §§ 27-30 malillugit saneqqutsisoqartillugu taamatulli taarsiissutitut piffissanik qasuersaarfeqartitsisoqarlunilu ullunik unnuanillu sulinngiffeqartitsisoqartassaaq. Pissutsit qaqutigooraluartumik tamanna ajornartissappassuk naleqquttumik illersuiniartoqartassaaq.

Imm. 2. § 27, imm. 1, nr. 1-imik saneqqutsinerni piffissap nal. akunnerinik 24-nik sivisussusillip ingerlanerani piffissat ullormoortumik qasuersaarfissat ataatsimut katillutik minnerpaamik nal. akunneri 11-iussappata taamatulli taarsiissutitut piffissanik qasuersaarfeqartitsisoqassaaq imaluun-niit imm. 1 malillugu taamatulli naleqquttumik illersuiniartoqartassaaq.

Kapitali 6 - Allaffissornikkut aalajangersakkat

Piginnaatitsissutit immikkullu akuersissuteqartarnerit

§ 32. Sullivinnik Nakkutilliisoqarfiup pisortaata akuerisinnaavaa suleriaatsit nalunaarummut ilanngussami pineqartut iluanni §§ 3-mik aamma 4-mik saneqqutsisoqartarsinnaasoq

sulianik ingerlatsinissaq suussusaa malillugu kinguartinneqarsinnaanngippat, imaluunniit
suleriaatsit immikkut ittut saneqqutsinissaq pisariaqartissappassuk.

Naammagittaalliorsinnaaneq

§ 33. Nalunaarut manna malillugu aalajangiinerit naammagittaalliuutaasinnaapput Kalaallit Nunaanni sullivinni avatangiisit pillugit inatsimmi § 64 malillugu.

Pinerluttulerinermik inatsisitigut pineqaatissiissutissat

§ 34. Kalaallit Nunaanni pinerluttulerinermik inatsit malillugu pineqaatissiinissaq eqqartuussutaassaaq kimulluunniit

1. §§ 3-5-imut, §§ 7-10-mut, §§ 12-16-imut akerliusumik suliaqartitsisumut imaluunniit taamatut suliaqarnernik siulersuisumut, nakkutilliisuusumut imaluunniit ingerlataqartumut,
2. nalunaarummi aalajangersakkanik unioqqutitsineq pillugu peqqussutaasunik malinnginngitsumut.

Imm. 2. Pineqaatissiissutissamik sakkortuussusiliinermi sakkortusaatitut naatsorsuunneqassaaq

1. unioqqutitsinerup piaaraluneernikkut imaluunniit mianersuaalliorujussuarnikkut pisimanera,
2. unioqqutitsinikkut inuunermik peqqissutsimilluunniit ajoqusiisimaneq tamatuminngaluunniit
   aarlerinartorsiortitsisimaneq,
3. pissutsit taakkuttaaq imaluunniit taakkununnga assingusut pillugit siusinnerusukkut peqqussute
   qartoqareersimanera Kalaallit Nunaanni sullivimmi avatangiisit pillugit inatsimmi § 60, imm. 1,
   imaluunniit 2, malillugu, imaluunniit
4. unioqqutitsinikkut pineqartup imminut allanulluunniit aningaasatigut iluanaarutississimanera tamatuminngaluunniit siunertaqarsimanera.

Imm. 3. §§ 3-5-imik, §§ 7-10-mik imaluunniit §§ 12-16-imik unioqqutitsinerni sulisitsisuusoq akiliisussanngortitaasinnaavoq unioqqutitsineq sulisitsisumut piaaraluneernertut mianersuaalliornertulluunniit tutsinniarneqarsinnaanngikkaluaq. Akiliisussanngortitaanissamut patsisissaassaaq unioqqutitsinerup inummut inunnulluunniit arlalinnut sullivimmut attuumassutilinnut imaluunniit sullivimmut taamatut illuni tutsinniarneqarsinnaanissaa. Aalajangersagaq manna malillugu akiliisitsinissani Kalaallit Nunaanni pinerluttulerinermik inatsimmi § 91, imm. 4, atortuutinneqassanngilaq.

Imm. 4. Akiliisitsissutissat annertussusilernissaanni imm. 2, nr. 2-4, taamatulli atortuutinneqassapput.
Imm. 5. Unioqqutitsinerit, inunnit allat sinnerlugit ingerlatsisuusunit, tamatumani aamma ingerlatsiviit aktie-, anparts-, aamma andelsselskabit, interessentskabit, peqatigiiffiit, aningaasaateqarfiit, pigisanik isumannaarisartut, kommunit, kommunit kattuffiat, Kalaallit Nunaanni kommunalbestyrelsit nunaqarfinnilu aqutsisut il. il. pillugit Inatsisartut inatsisaanni § 64-imi pineqartut, Namminer-sornerullutik Oqartussat naalagaaffillu, pillugit ingerlatsivik il. il. taamaattutut akiliisussanngorti-taasinnaapput.

Atortuulersitsineq il. il.

§ 35. Nalunaarut atuutilissaaq ulloq 1. februar 2006.

Imm. 2. Peqatigisaanik atorunnaassaaq piffissaq qasuersaarfissaq aamma ulloq unnuarlu sulinngiffeqarfissaq pillugit Kalaallit Nunaannut nalunaarut nr. 397, 24. juni 1986-imeersoq.

Sullivinnik Nakkutilliisoqarfik, ulloq 23. januar 2006

JENS JENSEN /Charlotte Skjoldager

Ilanngussaq 1

Suleriaatsit § 3-mik imaluunniit § 4-mik saneqqutsiviusinnaasut

1. Suliaqarnerit sulisuusup suliaqarfigisaata najugaatalu akornanni ungasissutsitigut imaluunniit sulisuusup suliaqarfiisa assigiinngitsut akornanni ungasissutsitigut ilisarnaasikkat.
2. Pigaartuunerit, alaatsinaarisuunerit aamma ulloq unnuarlu sulisarnerit ajunngitsorsiassanik inunnillu illersuiniartariaqarnermik ilisarnaasikkat, s. ass. pigaartut, isaaffinnik nakkutilliisut imaluunniit pigaartut ingerlatseqatigiiffii pineqartillugit.
3. Suliaqarnerit, sullissinerit ataavartuunissaata imaluunniit tunisassiornerup ingerlaannarnissaata qularnaartariaqarneranik ilisarnaasikkat, s. ass. makku pineqartillugit a) napparsimmavinni assigisaattulluunniit suliffeqarfinni unittussanik tigooraaneq, passussineq aamma/imaluunniit paaqqinninneq, ilanngullugit iliuutsit nakorsanit ilinniagaqartunit, ulloq unnuarlu inissiisarfinnit paaqqinnittarfinnillu kiisalu parnaarussivinnit ingerlanneqartut,
   b) sulisorisat umiarsualivinni mittarfeqarfinniluunniit sulisorineqartut,
   c) tusagassiuisarfiit, radio, fjernsyn, filmiliorfiit, allakkeriviit nalunaarasuaateqarfiillu, ambulanceni sullissinerit, qatserisartoqarneq aamma inuinnarnik illersuiniarneq,
   d) gassimik, imermik sarfamillu pilersuinerit, eqqaavileriffiit ikuallaasarfeqarfiillu,
   e) suliffissuit, suleriaasii teknikkimut tunngasut pissutigalugit imaaliinnaq kipitinneqarsinnaanngitsut,
   f) ilisimatusarnerit ineriartortitsinerillu,g) nunalerineq, orpippassualerineq, naatitsiviuteqarneq, aallaaniarneq piniarnerlu,
   h) sulisut, illoqarfinni ilaasunik uteqattaartumik angallassinernik suliallit.
4. Suliaqarnerit, siumut ilimageriikkanik saniatigut suliaqarfiulersartut, s.ass.
   a) nunalerinerup, orpippassualerinerup, naatitsiviuteqarnerup. aallaaniarnerup piniarnerullu iluanni,
   b) takornariartitsinermik inuussutissarsiutini,
   c) allakkeriveqarnermi,
5. Suliaqarnerit, ullup ingerlanerani piffissanik sivikinnerusunik arlaliusunik suliaqarfiusartut, s.ass. eqqiaanernik.
6. Atortussiassanik piiaanerni suliaqarnerit.