Nalunaaqqaarluni nalunaaqqaarnaniluunniit misissuiartorneq

Sullivinnik Nakkutilliisoqarfik nalunaarutigisamik nalunaarutigisaanngitsumilluunniit nakkutilliinermut atatillugu suliffeqarfimmut ornigussinnaavoq.

  • Nalunaarutigisamik ornigunnermi suliffeqarfik Sullivinnik Nakkutilliisoqarfimmit siumoortumik attaveqarfigineqarsimasarpoq. Ulloq piffissarlu orniguffiusussaq pillugu suliffeqarfik aamma Sullivinnik Nakkutilliisoqarfik isumaqatigiissuteqarsinnaapput, imaluunniit ornigunnissaq pillugu Sullivinnik Nakkutilliisoqarfik nalunaaruteqaannarsinnaalluni.
  • Nalunaarutigisaanngitsumik orniguttoqartillugu nakkutilliisoq ataaseq arlallilluunniit siumoortumik isumaqatigiissuteqaqqaarnatik suliffeqarfimmut orniguttarput.

Nalunaarutigisamik nalunaarutigisaanngitsumilluunniit misissuiartornerup pinera apeqqutaatinnagu nakkutilliisoq peqatigalugu sullivimmi avatangiisit misissornissaannut piffissamik pisariaqartumik isumalluutinillu pisariaqartunik immikkoortitsinissamut suliffeqarfik piareersimassaaq.

Nakkutilliisoq kinaassutsimut allagartamik takutitsisussaavoq eqqartuussivimmillu aalajangiiffigineqaqqaarnani suliffeqarfimmut isersinnaatitaalluni. Nakkutilliisoq suliffeqarfimmit misissugassanik aamma tigusisinnaatitaavoq assiliisinnaatitaallunilu.